Prentsa oharra • 2016ko abenduaren 15a

Euskararen Aholku Batzordeko Gazteria Batzorde-Atalaren ikerlan batek aztertu du euskarak zer-nolako lekua betetzen duen 12 eta 14 urte arteko gazteen unibertsoan

“Gu gazteok” deritzo ikerlanak eta abenduaren 19an aurkeztuko da, eguerdiko 12etan, Euskaltzaindiak eta Sabino Arana Fundazioak antolatutako mintegiaren baitan

Euskararen Aholku Batzordeko Gazteria Batzorde-Atalaren ikerlan batek aztertu du euskarak zer-nolako lekua betetzen duen 12 eta 14 urte arteko gazteen unibertsoan

Sabino Arana Fundazioak eta Euskaltzaindiak elkarlanean antolatuta, “Gu gazteok”, nola bizi [dugu/gara] euskara(z)? - “Nosotros los jóvenes”, ¿cómo vivimos el/en euskera? izeneko jardunaldia izango da datorren astelehenean, abenduaren 19an, eguerdiko 12etatik 13:45era, Sabino Arana Fundazioaren egoitzan.

Jardunaldian, Kike Amonarriz soziolinguista eta EiTBko aurkezleak eta Jone Miren Hernández EHUko Gizarte Antropologiako irakasleak jardungo dute hizlari. Mintegi horretan, “Gu gazteok” izeneko ikerlanaren emaitzak aurkeztuko dira. Euskararen Aholku Batzordeko Gazteria Batzorde-Atalak gauzatu du ikerketa, eta bertan, euskarak gaztetxoen unibertsoan zer-nolako lekua betetzen duen aztertu da. 

12 eta 14 urte arteko nerabeak laginketaren oinarritzat hartu ditu ikerlanak. Hala, ikerlanari esker, gaztetxo horien euskararekiko harremanen eta eguneroko bizipenen berri jakin dezakegu. Gazteon eguneroko bizimoduari lotutako datu esanguratsuak jaso eta mahai gainean jarri dira diren-direnean, hausnarketarako abiapuntutzat harturik. Hausnarketa horren xede nagusia euskararen gizarte-normalizazioa lortzea da.