Hedabideentzako deialdia • 2026ko urriaren 21a

Adimen artifizialak Medikuntzan eta Onkologian duen eragina aztertuko du Jurgi Camblongek Bidarten

Urriaren 21ean, Sophia Genetics konpainiaren sortzaile eta zuzendari exekutiboak parte hartuko du Sabino Arana Fundazioak antolatu eta Franck Dolosor kazetariak gidatuko duen hitzaldi-eztabaida batean

Sabino Arana Fundazioak «Adimen artifiziala Medikuntzan eta Onkologian» gaiari buruzko hitzaldi-eztabaida antolatu du datorren asteazkenean, urriak 21 dituela, 18:30etik 20:00etara, ESTIA Ingeniari Eskolan (Izarbel teknopolia, Bidarte). Topaldi horretan, Jurgi Camblong Biologiako doktore eta Sophia Genetics konpainiaren sortzaile eta zuzendari exekutiboa mintzatuko da; Franck Dolosor kazetariak gidatuko du saioa.

Mintzaldian, Camblongek adimen artifizialak, medikuntza genomikoak eta datuen prozesamenduak eskaintzen dituzten aukerak aztertuko ditu, minbiziaren eta gaixotasun hereditario arraroen diagnostikoan eta tratamenduan aurrera egiteko, bai eta teknologia berri horiek osasun-arloan erabiltzeak dakartzan erronkak ere.

Jurgi Camblongek  Sophia Genetics konpainia sortu zuen Bidarten, Girondan, Suitzan eta Estatu Batuetan. Medikuntza genomikoan eta datuen analisian oinarritutako irtenbideak garatzen ditu, osasun-profesionalei erabaki klinikoak hartzen laguntzeko. Konpainiak 75 herrialdetako 1.000 unibertsitate-ospitale baino gehiagorekin egiten du lan sarean, eta 2017an, MIT Technology Review aldizkariak munduko 30. enpresa adimentsuena izendatu zuen.

Hitzaldi-eztabaiden helburua eraldaketa teknologikoari buruzko hausnarketa-gunea eskaintzea da, Medikuntzaren praktika eta, bereziki, gaixotasun onkologikoen ikerketa, diagnostikoa eta tratamendua aldatzen ari dena. Adimen artifizialak osasunaren eremuan gaur egun eta etorkizunean izango duen eragina zuzenean ezagutu nahi duten pertsona guztientzat zabalik dago topaldia.

Hitzaldiaren hizkuntza: frantsesa.