Hedabideentzako deialdia • 2026ko ekainaren 18a

Etxeko istripuei eta etxeko segurtasunari buruzko hitzaldia

Javier Larreak, OPRAko presidenteak, etxeko arrisku nagusiak identifikatzeko eta prebenitzeko aholku erabilgarriak eskainiko ditu.

 

Helduak Elkarteak eta Sabino Arana Fundazioak beste hitzaldi bat eskainiko dute datorren ekainaren 18an, ostegunarekin, gaur egun adinekoak gehien kezkatzen dituzten gaiei buruz, hala nola etxeko segurtasunari eta etxeko istripuen prebentzioari buruz. Hitzaldia 19:00etan izango da Sabino Arana Fundazioaren egoitzan, Bilbon, eta Javier Larrea Arriskuen eta Istripuen Prebentziorako Behatokiko (OPRA) presidenteak emango du.

Ikuspegi praktiko eta dibulgatzailea erabiliz, hitzaldiak etxeko giroan azaltzen diren arrisku nagusiak jorratuko ditu, eta istripuak prebenitzeko gomendioak emango ditu, kasu askotan, istripuok ondorio larriak izan ditzaketelako, batez ere adinekoen artean. Saioan, halaber, Euskadin istripuetan hildako biktimei buruzko datuak eta estatistikak aurkeztuko dira, bai eta arrisku handiena duten eguneroko jarduerei eta prebentzio-neurri eraginkorrenei buruzko informazioa ere.

Besteak beste, ebaketa eta kontusioei, ebaketa-erreminten erabilerari, brikolaje- eta lorezaintza-jarduerei, elikadura-intoxikazioei eta garbiketa-produktuei lotutako arriskuak aztertuko ditu Javier Larreak, baita elektrizitateak, erredurek edo karbono monoxidoak eragindako intoxikazioek, eztarri-trabatzeek edo etxeko suteek eragindako arriskuak ere. Era berean, arreta bereziz aletuko dira erorikoak, etxeko istripuen arrazoi nagusietako bat baitira, bai eta laguntza-baliabideei ere, hala nola BetiON telelaguntza-zerbitzuari.

Javier Larrea Merkataritza nabigazioko kapitaina da, eta Bilboko Suhiltzaileen Zerbitzuko burua izan da, oposizio bidez; horrez gain, Suhiltzaileen Teknikarien Elkarte Profesionaleko presidentea eta idazkari nagusia eta Bilboko Udaltzaingoaren zuzendariordea ere izan da. Gaur egun, OPRAko presidentea da. Gizarte Zientzietako Ikerketako masterduna ere, eta doktoretza egiten ari da EHU-Euskal Herriko Unibertsitatean. Bertan, istripuak eragiten dituzten gizarte-kausak ikertzen ditu.