Efemeridea • 2021ko azaroaren 2a

Andima Ibinagabeitia Idoiaga, euskaltzale eta abertzale sutsua

Ibinagabeitiaren lana hertsiki lotuta egon zen Euzko Gogoa aldizkariarekin, hau da, erbesteko euskaldunek argitaratu zuten aldizkari ezagunenarekin.

Gaurkoa lako egun batean, 1967ko azaroaren 2an, Caracasen (Venezuela) hil zen Andima Ibinagabeitia, joan den mendeko euskaltzale handienetako bat, bai Parisko erbestealdian, bai Latinoamerikako egonaldian, lehenengoz, Guatemalan eta, geroago, Venezuelan.

Elantxoben jaio zen 1906an. Euzko Gogoa aldizkarian (erbesteko euskaldunek kaleratutako literatura aldizkaririk esanguratsuena) egin zituen ekarpen garrantzitsuenak, bai eta, Ibinagabeitiak berak sortutako Irrintzi eta Eman aldizkarietan ere. Gerra Zibila piztu zenean, Portugalen zegoen lanean, baina hura amaitzean, Euskadira itzuli zen eta bere burua eskaini zion Eusko Jaurlaritzari klandestinitatean lan egiteko.

1947an, aurkitzear zegoela, Parisera joan zen. Ondoren Guatemala eta Venezuela. Hain zuzen ere, Caracaseko Euskal Etxearen esparruan, euskararen beste bultzatzaile garrantzitsu batzuekin lan egin zuen, besteak beste, Martin Ugalde, Vicente Amezaga eta Toribio Etxeberriarekin. 1961ean euskaltzain urgazle izendatu zuten.